अवनी चतुर्वेदी बनली भारतातील पहिली फायटर पायलट!

भारतीय वायुसेनेतील 'फ्लाइंग ऑफिसर' अवनी चतुर्वेदी हिने मिग-२१ 'बायसन' हे लढाऊ विमान एकटीने उडवून एक नवा इतिहासच रचला आहे.

१९ फेब्रुवारीच्या सकाळी अवनीने गुजरातच्या जामनगर लष्करी हवाई तळावरून उड्डाण घेतले आणि ही मोहीम यशस्वी केली. एकटीनं लढाऊ विमान उडविणारी पहिली भारतीय महिला होण्याचा मानही तिनं मिळवला.

अवनीने या मोहिमेला सुरूवात करण्यापूर्वी सोमवारी सकाळी तिच्या प्रशिक्षकांनी मिग-२१ 'बायसन' विमानाची पूर्णतः पडताळणी केली. उड्डाणादरम्यान लक्ष ठेवण्यासाठी तसंच अवनीला प्रोत्साहन देण्यासाठी अनुभवी फ्लायर्स आणि तिचे प्रशिक्षक जामनगर लष्करी तळावरील हवाई वाहतूक नियंत्रण कक्ष आणि धावपट्टीवर उपस्थित होते. अवनीने उडविलेले मिग-२१ 'बायसन' हे लढाऊ विमान जगातील सर्वाधिक लँडिंग आणि टेक-ऑफ स्पीड असणारे विमान आहे.

एखादं लढाऊ विमान एकट्यानं उडविणं हे पूर्णतः एक 'फायटर पायलट' बनण्याच्या दिशेने पहिलं पाऊल असतं. अवनीने यशस्वीरित्या हे पहिलं पाऊल उचललं असून या क्षेत्रात येऊ इच्छिणाऱ्या तिच्यासारख्याच महत्त्वाकांक्षी महिलांसाठी एक नवं अवकाशच निर्माण करून दिलं आहे.

अवनीचं हे यश भारतीय वायुसेनेसाठीच नव्हे तर संपूर्ण देशासाठी अभिमानाची गोष्ट असल्याचं मत एअर कमोडोर प्रशांत दीक्षित यांनी व्यक्त केलंय.

२०१६ मध्ये अवनी चतुर्वेदी, मोहना सिंह आणि भावना या तीन स्त्रियांना प्रथमच वायुसेनेत फायटर पायलट बनण्यासाठी प्रवेश देण्यात आला होता. तत्पूर्वी ऑक्टोबर २०१५ मध्ये सरकारने स्त्रियांना फायटर पायलट बनण्यासाठीचा मार्ग मोकळा करून दिला होता.

ब्रिटन, अमेरिका, इस्त्रायल आणि पाकिस्तान यांसारख्या जगातील निवडक देशांमध्येच स्त्रिया फायटर पायलट बनू शकतात.