"चंद्रकांत पाटील माफी मागा, नाहीतर"...संजय राऊत यांची नोटीस
शिवसेनेचे खासदार संजय राऊत आणि भाजपचे प्रदेशाध्यक्ष चंद्रकांत पाटील यांच्यातील शाब्दिक संघर्ष आता चिघळला आहे. हा संघर्ष आता कायदेशीर पातळीवर पोहोचला आहे. कारण संजय राऊत यांनी चंद्रकांत पाटील यांना बदनामीचा दावा ठोकणारी नोटीस पाठवली आहे. चंद्रकांत पाटील यांनी आपल्याविरुद्ध आणि आपल्या पत्नीविरुद्ध बिनबुडाचे आरोप केले असल्याचे संजय राऊत यांनी या नोटिशीमध्ये म्हटले आहे. तसेच चंद्रकांत पाटील यांनी बिनशर्त माफी न मागितल्यास त्यांच्याविरुद्ध कायदेशीर कारवाईसाठी कोर्टात जाऊ, असा इशारा संजय राऊत यांनी दिला आहे. संजय राऊत यांनी ट्विट करुन ही माहिती दिली आहे.
I have issued a legal notice to Chandrakantdada Patil for his defamatory, baseless and bogus comments against me and my wife. If Chandrakant dada doesn't give an unconditional apology..I will be taking further legal action and move the honourable court
— Sanjay Raut (@rautsanjay61) October 8, 2021
जय महाराष्ट्र!! pic.twitter.com/tHD6O8rIRR
चंद्रकांत पाटील यांनी शिवसेनेचे मुखपत्र सामनाला पाठवलेल्या पत्रामध्ये संजय राऊत आणि त्य़ांच्या पत्नीवर काही आरोप केले होते. यामध्ये पीएमसी बँकेतील घोटाळ्यातून वर्षा राऊत यांना ५० लाख रुपये मिळाल्याचा आरोप चंद्रकांत पाटील यांनी केला होता. तसेच ED आणि CBI सारख्या यंत्रणांच्य़ा वापराची धमकी दिली होती, असा आरोप संजय राऊत यांनी या पत्रात केला आहे. आपल्या पत्नीवर खोटे आरोप चंद्रकांत पाटील यांनी केले तसेच एका महिलेवर खोटे आरोप करुन बदनामी केल्याचे संजय राऊत यांनी म्हटले आहे.
पण संजय राऊत यांनी काही दिवसांपूर्वी या आरोपांना दळभद्री म्हणत चंद्रकांत पाटील यांच्यावर आपण केवळ सव्वा रुपयांचा अब्रु नुकसानीचा दावा ठोकणार असल्याचा इशारा दिला होता. त्यानुसार आता संजय राऊत यांनी चंद्रकांत पाटील यांना नोटीस बजावली आहे.
