ब्राह्मणाला ब्राह्मण म्हटलं, तर वाईट वाटत नाही मग शुद्राला शुद्र बोललं तर वाईट का वाटतं? साध्वी प्रज्ञासिंह
मालेगाव बॉम्बस्फोट प्रकरणात जामीनावर असलेल्या भाजपच्या वादग्रस्त खासदार प्रज्ञा सिंह ठाकूर यांनी पुन्हा एक वादग्रस्त विधान करुन रोष ओढावून घेतला आहे. सिहोर (मध्यप्रदेश) इथे बोलताना प्रज्ञा सिंह ठाकूर यांनी वर्ण व्यवस्थेवर वक्तव्य केलं, "ब्राह्मणाला ब्राह्मण म्हटलं, तर वाईट वाटत नाही. पण, शुद्राला शुद्र म्हटलं, तर वाईट वाटतं. कारण काय आहे, तर समजत नाही," असा सवाल उपस्थित केल्यानं आता नव्या वादाला तोंड फुटलं आहे.
2008 साली झालेल्या महाराष्ट्रात मालेगाव बॉम्बस्फोट प्रकरणी साध्वी प्रज्ञासिंह ठाकूर या सध्या जामीनावर आहेत. मध्य प्रदेशातील सेहोरमध्ये आयोजित एका कार्यक्रमात बोलताना प्रज्ञा सिंह ठाकूर यांनी हे वादग्रस्त वक्तव्य केलं. खासदार ठाकूर म्हणाल्या,"क्षत्रियाला क्षत्रिय म्हटलं, तर त्याला वाईट वाटत नाही. ब्राह्मणाला ब्राम्हण म्हणा, तर वाईट वाटत नाही. वैश्याला वैश्य म्हटलं, तर वाईट वाटत नाही. शुद्राला शुद्र म्हटलं की, वाईट वाटतं. कारण काय आहे? तर समजू शकत नाही," असं विधान प्रज्ञा सिंह ठाकूर यांनी केलं आहे.
भाजपाचे अध्यक्ष जे.पी. नड्डा पश्चिम बंगालच्या दौऱ्यावर असताना त्यांच्या ताफ्यावर हल्ला झाला होता. या घटनेवरून खासदार प्रज्ञा सिंह ठाकूर यांनी पश्चिम बंगालच्या मुख्यमंत्री ममता बॅनर्जी यांच्यावर निशाणा साधला आहे. "आगामी विधानसभा निवडणुकीत भाजपा विजयी होणार आहे आणि पश्चिम बंगालमध्ये हिंदू राज येणार आहे. आपली सत्ता संपुष्टात येणार असल्याची जाणीव झाल्यानेच ममता बॅनर्जी हताश झाल्या आहेत," अशी टीका ठाकूर यांनी केली.
राष्ट्रद्रोही कारवाया करणाऱ्या जनसमुदायाच्या लोकसंख्येवर नियंत्रण आणले पाहीजे, क्षत्रिय हे देशाचे रक्षण करतात, त्यामुळे त्यांनी अधिका मुलं जन्माला घालायला हवी. क्षत्रियांचा वंशच संपला तर देशाचं रक्षण करणार कोण? असाही वादग्रस्त सवाल खा. साध्वींनी उपस्थित केल्यानं आता चुहबाजूनं टीका सुरु झाली आहे.
