खानदेशातील जळगाव, धुळे, नंदुरबार जिल्ह्यात अवकाळी पाऊस आणि गारपिटीमुळे मोठे नुकसान
धुळे जिल्ह्यातील साक्री, पिंपळनेरसह नंदुरबार तालुक्यातील शनीमांडळ, रजाळे, इंद्रिहट्टी तसेच जळगाव जिल्ह्यातील चाळीसगाव, पाचोरा, पारोळा, जामनेर परिसरात गारपीट झाली.
साक्री तालुक्यातील शेणपूर, मलांजन आणि पिंपळनेर परिसरात दुपारी ३ वाजेच्या सुमारास तुफान गारपीट झाली. त्यामुळे भाजीपाल्यासह फळबागांचे मोठ्या प्रमाणात नुकसान झाले. धुळे येथील कुसुंबा परिसरातही वादळाचा मोठा तडाखा बसला.
नंदुरबारमधील शनीमांडळ आणि रजाळे परिसरात सुमारे २० मिनिटे गारपीट झाली. रजाळे येथील फुमा माता यात्रोत्सवासाठी आलेल्या व्यावसायिकांची यामुळे मोठी धांदल उडाली. उन्हाळी कांदा, भुईमूग व टरबूज पिकांचे मोठे नुकसान झाले.
जळगाव शहरात सायंकाळी पाच वाजेच्या सुमारास जोरदार पाऊस झाला. चाळीसगाव, पारोळा, जामनेर आणि पाचोरा तालुक्यात सायंकाळी ५ नंतर विजांच्या कडकडाटासह वादळी पाऊस झाला. पिंपळगाव हरेश्वर तसेच सोयगाव परिसरात वादळामुळे पिके आडवी झाली. पारोळा येथे अनेक शेतकऱ्यांच्या कृषी सोलर पॅनेललाही फटका बसला आहे.
