'मॅक्स महाराष्ट्र'च्या वृत्तानंतर आमदार आणि जिल्हाधिकारी शेतकऱ्यांच्या बांधावर

बुलडाणा जिल्ह्यातील शेतकऱ्यांचे परतीच्या पावसाने नुकसान झाल्याचं वृत्त 'मॅक्स महाराष्ट्र'ने प्रकाशित केलं होतं. या वृत्तानंतर आमदार आकाश फुंडकर आणि जिल्हाधिकारी डॉ. निरुपमा डांगे यांनी नुकसानग्रस्त भागाची पाहणी केली आणि शेतकऱ्यांना मदत करण्याचं आश्वासन दिलं.

जिल्हाधिकारी डॉ. डांगे यांच्यासोबत खामगाव तालुका कृषी अधिकारी गिरी, कृषी विभागाचे अधिकारी, कर्मचारी तसेच शेतकरी उपस्थित होते. यावेळी जिल्हाधिकारी यांनी विहित कालावधीत तातडीने संयुक्तरित्या नुकसानग्रस्त पिकांचे पंचनामा करण्याचे आदेश दिले.

याशिवाय खामगावचे आमदार आकाश फुंडकर यांनी ज्वारी, मका, सोयाबीन या पिकांच्या नुकसानीची पाहणी केली. मतदारसंघातील सर्वच पिकांचे पंचनामे करण्याचे निर्देश यावेळी आमदार फुंडकर यांनी दिले. पिकविमा काढलेल्या पिकासोबतच ज्यांनी पीक विमा काढला नाही अशा शेतकऱ्यांचे शेतीचे पिकाचे देखील पंचनामे करण्याच्या सूचनाही फुंडकर यांनी दिल्या.

सरकार शेतकऱ्यांच्या पाठीशी असून ज्यांनी पिकविमा काढला त्यांना आणि ज्यांनी पीक विमा काढला नाही अशा शेतकऱ्यांना देखील मदत मिळवून देण्यात येईल. त्यासाठी ३० ऑक्टोबर रोजी मुख्यमंत्र्यांना भेटून याबाबत मागणी करणार असल्याचंही त्यांनी सांगितलं.