संजय राऊत यांच्या अटकेचे संसदेत पडसाद उमटणार

शिवसेनेचे खासदार संजय राऊत यांना EDने अटक केल्यानंतर त्यांना आज कोर्टात हजर केले जाणार आहे. पण त्यांच्या या अटकेमागे राजकीय हेतू असल्याचा आरोप शिवसेनेने केला आहे. तसेच आता राऊत यांच्य अटकेचा मुद्दा संसदेत देखील शिवसेनेतर्फे मांडला जाणार आहे. शिवसेनेच्या खासदार प्रियंका चतुर्वेदी यांनी हाच मुद्दा राज्यसभेत मांडण्यासाठी स्थगन प्रस्ताव दिला आहे.

राज्यसभेतील सर्व कामकाज बाजूला ठेवून ED, CBI आणि आयकर विभाग या केंद्रीय यंत्रणांच्या गैरवापरावर चर्चेची मागणी प्रियंका चतुर्वेदी यांनी केली आहे. या केंद्रीय यंत्रणांच्या माध्यमातून केंद्र सरकार आपला राजकीय अजेंडा राबवत आहे आणि विरोधकांना गप्प करण्यासाठी यंत्रणांचा वापर करत आहे, असा आरोप प्रियंका चतुर्वेदी यांनी केला आहे.

संजय राऊत यांच्यावर ईडीने कारवाई केल्यानंतर राष्ट्रवादीच्या खासदार सुप्रिया सुळे यांनी देखील केंद्रीय यंत्रणांच्या गैरवापराचा मुद्दा संसदेत मांडणार असल्याचे म्हटले होते. त्यामुळे सोमवारी सकाळी संसदेचे कामकाज सुरू होताच गदारोळ होण्याची शक्यता आहे. एकीकडे काँग्रेसने सोनिया आणि राहुल गांधी यांच्या ईडी चौकशीवरुन आक्रमक भूमिका घेतली आहे. तर आता संजय राऊत यांच्या अटकेच्या निषेधार्थ शिवसेनाही आक्रमक झाली आहे.