शिवसेना कुणासोबत द्रौपदी मुर्मू की यशवंत सिन्हा? संजय राऊत यांचे संकेत
एकनाथ शिंदे यांच्या बंडखोरीनंतर शिवसेनेच्या खासदारांनीही आता उद्धव ठाकरे यांच्यावर भाजपसोबत जाण्यासाठी दबाव टाकल्याची चर्चा आहे. याच पार्श्वभूमीवर शिवसेनेच्या बहुतांश खासदारांनी राष्ट्रपतीपदासाठी भाजपच्या द्रौपदी मुर्मू यांच्या नावाला पाठिंबा देण्याची मागणी सोमवारी झालेल्या पक्षाच्या बैठकीत केली. या बैठकीत काय चर्चा झाली याची माहिती शिवसेनेचे खासदार संजय राऊत यांनी दिली आहे. "आदिवासी क्षेत्रात काम करणारे अनेक कार्यकर्ते शिवसेनेत कार्यरत आहेत, द्रोपती मुर्मु यांच्या बद्दल बैठकीत चर्चा झाली,प्रत्येकाचे मत आम्ही समजून घेतले आहे" असे संजय राऊत यांनी सांगितले.
पण द्रौपदी मुर्मू यांना पाठिंबा म्हणजे भाजपला पाठिंबा नाही असे सांगत शिवसेनेची भूमिका एक ते दोन दिवसात स्पष्ट होईल, अशी माहितीही राऊत यांनी दिली आहे. तसेच शिवसेना पक्षप्रमुख उद्धव ठाकरे याबाबत अंतिम निर्णय घेतील, अशीही माहिती राऊत यांनी दिली.
देशात विरोधी पक्ष टिकला पाहिजे, राष्ट्रपती पदाचे उमेदवार यशवंत सिन्हा यांनाही आमच्या सद्भावना आहेत पण लोकभावना काय आहे यानुसार निर्णय घ्यावा लागतो, असे सांगत संजय राऊत यांनी मुर्मू यांना पाठिंबा देण्याचे संकेत दिले आहेत. यापूर्वी शिवसेनेने प्रतिभा पाटील यांना पाठिंबा दिला होता, त्यावेळी एनडीएच्या उमेदवाराला पाठिंबा दिला नव्हता, याची आठवणही राऊत यांनी करुन दिली आहे. शिवसेनेला असे निर्णय घेण्याची परंपरा आहे, पण शिवसेना पक्षप्रमुख कुठल्याही दबावाखाली निर्णय घेत नाहीत, असे स्पष्ट करत संजय राऊत यांनी लवकरच निर्णय घेतला जाईल अशी माहिती दिली आहे.
दरम्यान शिवसेनेच्या या बैठकीलाही शिवसेनेचे काही खासदार गैरहजर होते. खासदार संजय राऊत या बैठकीतून निघून गेल्याची चर्चा होती. पण आता राऊत यांनी यावर स्पष्टीकरण दिले आहे. आपण सामना मध्ये काम असल्याने गेलो होतो, पण आपण उठून गेलो अशा बातम्या देण्यासाठी एक यंत्रणा काम करत असल्याची टीका संजय राऊत यांनी केली आहे.
