बाळासाहेब ठाकरेंच्या व्हिडिओवरुन राज ठाकरेंना संजय राऊत यांचे उत्तर
मशिदींवरील बेकायदा भोंगे काढण्यासाठी राज ठाकरे यांनी दिलेल्या अल्टिमेटमनंतर आता अनेक ठिकाणी मनसे कार्यकर्त्ये आक्रमक झाले आहेत. पण राज्यातील धार्मिक सलोखा कायम ठेवण्याचे आवाहन करत शिवसेना, राष्ट्रवादी आणि काँग्रेसने राज ठाकरे यांच्यावर टीका केली आहे. मुख्यमंत्री उद्धव ठाकरे यांनीही राज ठाकरे यांचे भाषण केवळ करमणूक असल्याची टीका केली होती. पण आता राज ठाकरे यांनी एक व्हिडिओ ट्विट करत उद्धव ठाकरे यांना टोला लगावला आहे. राज ठाकरे यांनी बुधवारी सकाळी ट्विटरवर शेअर केलेल्या व्हिडीओमध्ये दिवंगत बाळासाहेब ठाकरे मशिदींवरील भोंग्यांच्याविरोधात भूमिका मांडत असल्याचे दिसते आहे, ज्या दिवशी शिवसेनेचे सरकार राज्यात येईल, तेव्हा रस्त्यावरील नामाज पठण बंद केल्याशिवाय राहणार नाही, असा इशारा बाळासाहेब त्यात देतांना दिसताय. धर्म हा राष्ट्रविकासाच्या आड येता कामा नये आणि लोकांना त्याचा उपद्रव होता कामा नये, हिंदू धर्माचाही कोणाला उपद्रव होत असेल त्याने आपल्याला सांगावे आपण त्याचा बंदोबस्त करु, एवढेच नाही तर मशिदीवरील लाऊडस्पीकर पण खाली येतील, असेही बाळासाहेब यामध्ये म्हणाताना दिसत आहेत.
— Raj Thackeray (@RajThackeray) May 4, 2022
राज ठाकरेंनी या व्हिडिओमध्ये काही म्हटलेले नाही. पण आता संजय राऊत यांनी या व्हिडिओला उत्तर दिले आहे, बाळासाहेबांचे कितीही प्राचीन व्हिडीओ टाकले तरी शिवसेनेला बाळासाहेबांबाबत कुणी सांगण्याची गरज नाही, उलट राज ठाकरे यांनीच बाळासाहेब ठाकरे तपासले पाहिजेत, असा टोलाही त्यांनी लगावला आहे. बाळासाहेब ठाकरे यांनी भोंग्याच्या विरोधात आणि रस्त्यावर पढल्या जाणाऱ्या नमाजच्या विरोधात भूमिका मांडली, असली तरी त्यांनी त्यावर तोडगा काढून मग नमाज बंद केली, हा इतिहास समजून घ्यावा, असा टोलाही राऊत यांनी लगावल आहे.
