काँग्रेस नेत्याचे राष्ट्रपतींबाबत वादग्रस्त वक्तव्य, भाजप आक्रमक
काँग्रेसचे लोकसभेतील नेते अधीर रंजन चौधरी यांनी नवनिर्वाचित राष्ट्रपती द्रौपदी मुर्मू यांच्याबद्दल केलेल्या वक्तव्यावरुन वाद निर्माण झाला आहे. त्यांच्या या वक्तव्याचे पडसाद गुरूवारी संसदेच्या दोन्ही सभागृहात उमटले. गेल्या काही दिवसांपासून महागाई, बेरोजगारी या मुद्द्यांवरुन संसदेचे कामकाज रोखून धरणाऱ्या काँग्रेसची अधीर रंजन चौधरी यांच्या वक्तव्यामुळे कोंडी झाली आहे.
लोकसभा-राज्यसभेत भाजप आक्रमक
खासदारांचे निलंबन, महागाईवर संसदेत चर्चा करण्याची मागणी, सोनिया गांधी यांची ईडी चौकशी या सगळ्या मुद्द्यांवरुन काँग्रेस खासदार गेल्या काही दिवसांपासून संसदेबाहेर आंदोलन करत आहेत. या आंदोलना दरम्यान एका न्यूज चॅनेलशी बोलताना अधीर रंजन चौधरी यांनी द्रौपदी मुर्मू यांचा उल्लेख राष्ट्रपत्नी असा केला. त्यांच्या याच वक्तव्यावरुन भाजपने आता अधीर रंजन चौधरी यांनी माफी मागावी अशी मागणी करत लोकसभा आणि राज्यसभेत आक्रमक भूमिका घेतली. त्यामुळे गदारोळ झाला आणि दोन्ही सभागृहांचे कामकाज १२ वाजेपर्यंत तहकूब करण्यात आले.
केंद्रीय मंत्री स्मृती इऱाणी यांनी लोकसभेत य़ाच मुद्द्यावरुन काँग्रेसवर जोरदार प्रहार केला. काँग्रेसने एका आदिवासी महिलेचा, राष्ट्रपतीपदाचा अपमान केला आहे, असा आरोप करत सोनिया गांधी यांनी यावर उत्तर द्यावे अशी मागणी केली. तर राज्यसभेत केंद्रीय अर्थमंत्री निर्मला सीतारामन यांनी हाच मुद्दा उपस्थित करत जोरदार टीका केली. तसेच चौधरी यांनी माफी मागावी अशी मागणी केली.
अधीररंजन चौधरी यांचे स्पष्टीकरण
या गदारोळानंतर अधीररंजन चौधरी यांनी ट्टिव करुन आपण चुकून एकदाच राष्ट्रपत्नी असा उल्लेख केला, असे स्पष्टीकरण दिले आहे. तसेच त्या रिपोर्टरला आपण चुकून बोललेला तो दाखवू नये अशी विनंती केली होती. पण त्यांनी तो व्हिडिओ प्रसारित केला, असेही त्यांनी सांगितले आहे. राष्ट्रपती कोणत्याही जातीचे असले तरी ते आमच्यासाठी ते आदराचे आणि श्रद्धेचे पद आहे, असेही त्यांनी स्पष्ट केले आहे.
सोनिया गांधी यांची प्रतिक्रिया
दरम्यान एएनआय या वृत्तसंस्थेला काँग्रेस अध्यक्षा सोनिया गांधी यांनी दिलेल्या प्रतिक्रियेमध्ये अधीररंजन चौधरी यांनी आधीच आपल्या वक्तव्याबाबत माफी मागितली आहे, अशी माहिती दिली.
