राज्यसभा निवडणूक : काँग्रेसतर्फे पुन्हा राज्याबाहेरील उमेदवार

राज्यसभा निवडणुकीच्या निमित्ताने राज्यातील वातावरण तापलेले असताना कॉंग्रेसने महाराष्ट्रातून राज्यसभेवर जाणाऱ्या उमेदवाराच्या नावाची घोषणा केली आहे. पण यंदाही काँग्रेसने महाराष्ट्राबाहेरील उमेदवार देण्याचा निर्णय घेतला आहे. अल्पसंख्याक विभागाचे अध्यक्ष इम्रान प्रतापगढी यांना उमेदवारी जाहीर करण्यात आली आहे.

महाविकास आघाडीमध्ये काँग्रेससोबत असलेल्या शिवसेनेने संभाजीराजेंना नाकारत शिवसैनिकाला उमेदवारी दिल्याने काँग्रेसची उमेदवारी कुणाला दिली जाते याकडे संपूर्ण राज्याचे लक्ष होते. इम्रान प्रतापगढी हे प्रियंका गांधी यांचे निकटवर्तीय समजले जातात. कॉंग्रेस पक्षश्रेष्ठींच्या या निर्णयामुळे राज्यात काँग्रेसमध्ये नाराजी असल्याचे देखील चर्चा सुरू झाली आहे.

दरम्यान भाजपने माजी कृषिमंत्री अनिल बोंडे यांना उमेदवारी दिली आहे. पण त्यांच्या उमेवारीवर राजकीय विश्लेषक हेमंत देसाई यांनी टीका केली आहे. "शरद पवारांचे वाईट दिवस सुरू झाले आहेत... हातावर हात देऊन बसाल, तर तुमच्या लेकीबाळींवर हिजाब घालण्याची वेळ येईल... अन्यथा गटविकास अधिकाऱ्याला फटके मारू... असे वादग्रस्त उद्गार अनिल बोंडे यांनी वेळोवेळी काढले होते. नाना पटोले यांचा पंजा छाटला जाईल, असा इशाराही त्यांनी दिला होता. तसेच नायब तहसीलदारांना शिवीगाळ आणि मारहाण केल्यावरून त्यांना शिक्षाही झाली होती. एवढे अचाट कर्तृत्व गाजवलेल्या माजी कृषिमंत्री अनिल बोंडे यांना भाजपने राज्यसभेची उमेदवारी दिली आहे. खरोखरच देश और भाजप बदल रहा है..." या शब्दात देसाई यांनी भाजपावर टीका केली आहे.