पहिल्यांदाच आमनेसामने, एकनाथ शिंदे विरुद्ध आदित्य ठाकरे

मुख्यमंत्री एकनाथ शिंदे आणि आदित्य ठाकरे यांच्यात विधिमंडळ अधिवेशनात जोरदार सामना रंगला. मुंबई महापालिकेतील वॉर्ड रचना पूर्वीसारखी करण्याच्या सुधारणा विधेयकावरुन आदित्य ठाकरे यांनी शिंदे सरकारवर टीकास्त्र सोडले. यानंतर मुख्यमंत्री एकनाथ शिंदे य़ांनी आदित्य ठाकरे यांच्या टीकेला उत्तर दिले. सर्वोच्च न्यायालयाने सध्या परिस्थिती जैसे थे ठेवण्याचे आदेश दिले असताना हे विधेयक मंजूर करण्याची घाई का केली जात आहे, असा सवाल आदित्य ठाकरे यांनी उपस्थित केला. त्यांच्या या आक्षेपाला उपमुख्यमंत्री देवेंद्र फडणवीस यांनी आधी उत्तर दिले. सर्वोच्च न्यायालयाने ओबीसी आरक्षणाच्या संदर्भात स्थिती जैसे थे ठेवण्यास सांगितले आहे, पण त्यामुळे वॉर्ड रचनेत बदल करण्यास स्थगिती आली आहे, असे अजिबात नाही असा दावा त्यांनी केला.

त्यानंतर मुख्य़मंत्री एकनाथ शिंदे यांनी आदित्य ठाकरे यांच्या टीकेला उत्तर दिले. सरकारला निवडणुकांची एवढी भीती का वाटते आहे, असा सवाल आदित्य ठाकरे यांनी विचारला होता. त्यांच्या या टीकेला मुख्यमंत्र्यांनी आम्ही अजिबात घाबरत नाही आमच्याकडे बहुतम आहे आणि ते वाढते आहे, असे सांगत आदित्य ठाकरेंना सुनावले. तसेच सरकारला घटनाबाह्य म्हणणाऱ्या आदित्य ठाकरेंना सरकार कायदेशीर आहे आणि बहुमतात आहे असेही सुनावले.