राज्यसभा निवडणूक : भाजपचा शिवसेनेला दे धक्का
अत्यंत चुरशीच्या ठरलेल्या आणि संपूर्ण देशाचे लक्ष लागलेल्या राज्यसभा निवडणुकीत भाजपने शिवसेनेला मोठा धक्का दिलेला आहे. अतिशय नाट्यपूर्ण घडामोडी नंतर रात्री उशिरा राज्यसभा निवडणुकीची मतमोजणी पार पडली आणि या मतमोजणीमध्ये शिवसेनेच्या संजय पवार यांचा पराभव झाला तर भाजपने उतरवलेले अतिरिक्त उमेदवार धनंजय महाडिक यांचा विजय झाला आहे.
महाविकासआघाडीसाठी हा मोठा धक्का मानला जात आहे. या निवडणुकीत भाजपने पियुष गोयल, अनिल बोंडे यांच्यासह धनंजय महाडिक यांना देखील उतरवले होते तर महाविकास आघाडीतर्फे राष्ट्रवादीचे प्रफुल्ल पटेल, काँग्रेसचे इम्रान प्रतापगडी, शिवसेनेचे संजय राऊत आणि संजय पवार हे उमेदवार रिंगणात होते. यापैकी प्रफुल्ल पटेल, इम्रान प्रतापगडी आणि संजय राऊत यांचा अपेक्षेप्रमाणे विजय झाला आहे. पण शिवसेनेला सगळ्यात मोठा धक्का बसला आहे तो संजय पवार यांच्या पराभवाचा...
भाजपने अपक्ष आमदारांना फोडण्यात यश मिळवल्याचे या निकालावरून दिसत आहे आपल्या सोबत 12 अपक्ष आमदार आहेत असा दावा महाविकासआघाडी ने केला होता पण या निकालानंतर हा दावा फोल ठरल्याचे दिसत आहे.
राज्यसभा निवडणुकीचे मतदान पार पडल्यानंतर भाजपने महाविकास आघाडीच्या तीन आमदारांच्या मतांवर आक्षेप घेतला होता. त्यानंतर हा वाद दिल्ली निवडणूक कार्यालयात देखील पोहोचला. रात्री उशिरा बारा वाजल्यानंतर केंद्रीय निवडणूक आयोगाने मतमोजणीची परवानगी दिली आणि त्यानंतर मुंबईत मतमोजणी झाली. जवळपास नऊ तास उशिराने ही मतमोजणी झाली.
भाजपाचे उमेदवार धनंजय महाडिक यांना पहिल्या पसंतीची 41.5 मत मिळाल्याने त्यांना विजयी घोषित करण्यात आले आहे. पियुष गोयल आणि अनिल बोंडे या भाजपच्या उमेदवारांना 48 मते मिळाली आहेत तर संजय राऊत यांना 41 मते मिळाली. राष्ट्रवादीचे प्रफुल्ल पटेल यांना त्रेचाळीस आणि काँग्रेसचे इम्रान प्रतापगडी यांना 44 मते मिळाली आहेत. पक्षीय संख्याबळाचा विचार करता भाजपचे 106 मत असताना भाजपला जवळपास 17 मत जास्त मिळाल्याचं या निकालातून दिसत आहे.
या निकालानंतर विरोधी पक्षनेते देवेंद्र फडणवीस यांनी एक ट्विट केले आहे. निवडणूक ही केवळ लढण्यासाठी आम्ही उतरलो नव्हतो तर ती जिंकण्यासाठी उतरलो होतं असं त्यांनी आपल्या ट्विटमध्ये म्हटले आहे.
