भाजपच्या नऊ आमदारांना मंत्रीपदाची संधी, मंगलप्रभात लोढा यांचे नाव निश्चित

राज्यात झालेल्या सत्तानाट्यानंतर 30 जून रोजी शिवसेनेतून बंड केलेले नेते एकनाथ शिंदे यांनी मुख्यमंत्री पदाची तर देवेंद्र फडणवीस यांनी उपमुख्यमंत्री पदाची शपथ घेतली. त्यानंतर महिना उलटून गेला तरी राज्यात मंत्रीमंडळाचा विस्तार झाला नव्हता. त्यामुळे विरोधकांकडून शिंदे-फडणवीस सरकारवर टीकेची झोड उठवली होती. त्यानंतर अखेर काही 9 ऑगस्ट रोजी मंत्रीमंडळाचा विस्तार होणार आहे. तर त्यासंदर्भात राजभवन येथे जोरदार तयारी करण्यात आली आहे.

महिनाभरानंतर करण्यात येणाऱ्या शिंदे फडणवीस सरकारच्या मंत्रीमंडळाच्या विस्तारात पहिल्या यादीत नऊ आमदारांना शपथ दिली जाणार असल्याची माहिती भाजप नेते मंगलप्रभात लोढा यांनी दिली. त्यामध्ये मंगलप्रभात लोढा हे सुध्दा राजभवनच्या दिशेने रवाना झाले आहेत. तर पंतप्रधान नरेंद्र मोदी, गृहमंत्री अमित शहा आणि जे पी नड्डा यांनी संधी दिली आहे. त्याचं सोनं करील असं मत लोढा यांनी माध्यमांशी बोलताना व्यक्त केले.

भाजपकडून गिरीश महाजन, चंद्रकांत पाटील, राधाकृष्ण विखे पाटील, मंगलप्रभात लोढा, संजय कुटे, सुधीर मुनगंटीवार यांच्यासह नऊ आमदार शपथ घेणार असल्याची माहिती सूत्रांनी दिली आहे.

शिंदे गटाकडूनही नऊ मंत्री शपथ घेणार असल्याची चर्चा आहे. त्यामध्ये संदीपान भुमरे, गुलाबराव पाटील, दादा भुसे, दीपक केसरकर, तानाजी सावंत, शंभुराज देसाई हे सुध्दा शपथ घेणार आहेत.