Video: जर तुम्हाला पेट्रोल स्वस्त हवे असेल तर अफगाणिस्तानला जा, भाजप नेत्याचा अजब सल्ला...
कोरोना महामारीच्या काळात पेट्रोल आणि डिझेलचे दर गगनाला भिडलेले आहेत. यामुळे, सामान्य माणूस कोरोना आणि महागाईच्या दुहेरी संकटांचा सामना करत आहे. दरम्यान, भारतीय जनता पक्षाच्या एका नेत्याने याबाबत वादग्रस्त विधान केलं आहे. जर तुम्हाला स्वस्त पेट्रोल आणि डिझेल हवे असेल तर अफगाणिस्तानला जा. असं वादग्रस्त विधान भाजप नेत्यांनी केलं आहे. पत्रकाराशी बोलतांना मध्य प्रदेशातील कटनीचे भाजप जिल्हाध्यक्ष रामरतन पायल म्हणाले, "तालिबानला जा, तिथे जा आणि पाहा. तिथे पेट्रोल 50 रुपये आहे. तिथून भरून या, तिथे पेट्रोल भरण्यासाठी कोणी नाही. दरम्यान, पायल यांनी पत्रकारांनाच खडे बोल सुनावले. देशात कोरोनाच्या दोन लाटा आल्या आहेत. तिसरी लाट येणार आहे. देश कोणत्या परिस्थितीतून जात आहे, तुम्हाला काही कल्पना आहे का? आणि तुम्हाला पेट्रोल आणि डिझेलचं पडलं आहे. "पण मी माझ्या देशाबद्दल बोलत आहे. महागाई शिगेला पोहोचली आहे? यावर भाजप नेते पुन्हा म्हणाले, 'मग तालिबान्यांकडे जा, तू इथे का आहेस'? धक्कादायक बाब म्हणजे व्हिडिओमध्ये भाजप जिल्हाध्यक्ष कोविडच्या तिसऱ्या लाटेच्या शक्यतेबद्दल बोलत होते. मात्र, त्यांनी स्वतः मास्क लावला नव्हता. एवढंच काय तर त्यांचे कार्यकर्तेदेखील मास्क न घालता एकत्र उभे होते.
