आदित्य ठाकरे यांची तातडीने चौकशी करा, थेट मुख्यमंत्र्यांकडे मागणी
एकीकडे केंद्रीय गृहमंत्री अमित शाह यांनी उद्धव ठाकरे यांच्याविरोधात आक्रमक भूमिका घेतली आहे. तर दुसरीकडे आता भाजपचे नेते किरीट सोमय्या यांनी पुन्हा एकदा आदित्य ठाकरे यांना लक्ष्य केले आहे. महाविकास आघाडी सरकारमधील अनेक नेत्यांवर भ्रष्टाचाराचे आरोप करणाऱ्या किरीट सोमय्या यांनी आता थेट आदित्य ठाकरे यांनाच लक्ष्य केले आहे.
किरीट सोमय्या यांनी गेल्या काही दिवसांपासून मुंबईतील मढ येथील एका स्टुडिओचा मुद्दा उचलून धरला आहे. यामध्ये जवळपास १ हजार कोटींचा घोटाळा झाल्याचा आरोप सोमय्या करत आहेत. मुंबईचे तत्कालीन पालकमंत्री अस्लम शेख यांच्यावर या प्रकरणात सोमय्या यांनी गंभीर आरोप केले आहेत. पण आता या १ हजार कोटींच्या मढ स्टुडिओ घोटाळ्यात माजी पर्यावरण मंत्री आदित्य ठाकरे, पालकमंत्री अस्लम शेख यांच्या भूमिकेची ताबडतोब चौकशी करा, अशी मागणी किरीट सोमय्या यांनी केली आहे. चौकशीच्या दरम्यान महापालिका तसेच पर्यावरण मंत्र्यालयातील संबंधित अधिकार्याला निंलबित करा अशी मागणी आपण मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडे केली आहे, अशी माहितीही सोमय्या यांनी माध्यमांशी बोलताना दिली आहे.
माजी गृहमंत्री अनिल देशमुख, नवाब मलिक, संजय राऊत हे नेते सध्या तुरूंगात आहेत. या सगळ्यांवर किरीट सोमय्या यांनी वारंवार गंभीर आरोप केले होते. तसेच आदित्य ठाकरे यांच्यावरही किरीट सोमय्या यांनी याआधीही आरोप केले आहेत. पण आता थेट मुख्यमंत्री आणि गृहमंत्री देवेंद्र फडणवीस यांच्याकडे आदित्य ठाकरे यांच्या चौकशीची मागणी करण्यात आल्याने ते काय कारवाई करतात ते पाहणे महत्त्वाचे ठरणार आहे.
