संजय राऊत : घोडेबाजार करण्याचा भाजपचा प्रयत्न

राज्यसभा निवडणुकीत भाजपने तिसरा उमेदवार उतरवल्याने आता राज्यसभेच्या सहाव्या जागेसाठी निवडणूक होणार आहे. पियुष गोयल, अनिल बोंडे यांच्यासह भाजपचे धनंजय महाडिक यांना उमेदवारी जाहीर केली आहे. त्यामुळे शिवसेनेपुढे आव्हान उभे राहिले आहे. या पार्श्वभूमीवर शिवसेनेनं पहिली प्रतिक्रिया दिली आहे. “छत्रपती संभाजी यांना कशाप्रकारे फसवण्याचे प्रयत्न भाजप करत होता आणि स्वतःचा उमेदवार त्यांना टाकायचा होता व त्यांना घोडेबाजार करायचा होता, हे स्पष्ट होते” असा आरोप संजय राऊत यांनी केला आहे.

“महाराष्ट्रात कोणी घोडेबाजार करून अशाप्रकारच्या निवडणुका लढणार असतील तर सरकारचेसुद्धा बारीक लक्ष आहे” असा इशारा राऊत यांनी दिला आहे. शिवसेनेकडे आवश्यक तेवढी सर्व मतं आहेत, असा दावाही त्यांनी केला आहे.

तसेच काँग्रेस महाविकास आघाडी सरकारमध्ये नाराज असल्याच्या चर्चेला उत्तर देताना असे काही नसल्याचे संजय राऊत यांनी स्पष्ट केले आहे. मुख्यमंत्री आणि काँग्रेस हायकमांड यांच्यात चर्चा होत असते, त्यामुळे सरकार अडचणीत नसल्याचे त्यांनी स्पष्ट केले. पण काँग्रेसने राज्यातील उमेदवार राज्यसभेसाठी दिला असता तर बरे झाले असते, असेही संजय राऊत यांनी म्हटले आहे.