राज्यसभा निवडणुकीची रंगत वाढली, भाजपने दिला तिसरा उमेदवार

राज्यसभा निवडणुकीची रंगत वाढली, भाजपने दिला तिसरा उमेदवार

संभाजीराजे यांनी शिवसेनेकडे राज्यसभेच्या सहाव्या जागेसाठी पाठिंबा मागितल्याने चर्चेत आलेली राज्यसभेची निवडणूक आता रंगतदार झाली आहे. राज्यातून राज्यसभेत जाणाऱ्या ६ जागांसाठी निवडणूक जाहीर झाल्यापासून सहावी जागा चर्चेत आहे. आता या जागेसाठीची निवडणूक रंगतदार होणार असल्याची जोरदार चर्चा आहे. भाजप २, शिवसेना १, काँग्रेस १ आणि राष्ट्रवादी काँग्रेस एक असे पाच उमेदवार निश्चित आहेत. पण सहाव्या जागेसाठी शिवसेनेने दुसरा उमेदवार दिला आहे. तर आता भाजपनेही तिसरा उमेदवार उभा केल्याने ही निवडणूक रंगतदार होणार आहे.

भाजपतर्फे केंद्रीय मंत्री पियुष गोयल, डॉ. अनिल बोंडे यांना रविवारी उमेदवारी जाहीर झाली होती. पण त्यानंतर संध्याकाळी उशिरा भाजपने कोल्हापूरचे माजी खासदार धनंजय महाडिक यांना उमेदवारी दिली आहे. त्यामुळे शिवसेनेला दुसरा उमेदवार निवडून आणण्याचे आव्हान निर्माण झाले आहे. धनंजय महाजिक यांनी ट्विट करुन पक्षाचे आभार मानले आहेत.

“भाजपाच्या केंद्रीय निवडणूक समितीने #RajyaSabhaElection2022 साठी महाराष्ट्रातून उमेदवार म्हणून माझी निवड केली याबद्दल मी पक्षाचा आभारी आहे. हा विश्वास सार्थ ठरवण्यासाठी देशाच्या सर्वोच्च सभागृहात सर्वोत्तम योगदान देईन, हा विश्वास यानिमित्ताने देतो. धन्यवाद !”