Global Market News : ट्रम्प यांचा इशारा आणि जपानचा निर्णय, जागतिक अर्थव्यवस्थेत भूकंप !
Global Market News: Trump's warning and Japan's decision, an earthquake in the global economy!
जागतिक अर्थकारणात दोन मोठ्या घटना घडल्या, ज्यामुळे संपूर्ण शेअर बाजार आणि गुंतवणुकीचे जग हादरले आहे. एकीकडे जपानमधील कर्जाचे दर (Interest Rates) अचानक वाढले आहेत
, तर दुसरीकडे अमेरिका आणि युरोपमध्ये 'ग्रीनलँड'वरून तणाव निर्माण झाला आहे. या अनिश्चिततेमुळे गुंतवणूकदार आपली संपत्ती विकत असल्याने बाजारात भीतीचे वातावरण आहे.
नक्की काय घडले ते सोप्या भाषेत समजून घेऊयात.
१. जपानमध्ये काय बिघडले ? (Japan Crisis)
जपान, ही जगातील प्रमुख अर्थव्यवस्था आहे, तिथे अचानक सरकारी कर्जाचे दर वाढले आहेत.
जपानच्या पंतप्रधानांनी अचानक निवडणुका जाहीर केल्या आहेत. जिंकण्यासाठी त्यांनी सरकारी पैशांचा वापर करून विविध योजना राबवण्याचे (Stimulus) आश्वासन दिले आहे.
सरकार जास्त खर्च करणार, म्हणजे सरकारला जास्त कर्ज घ्यावे लागणार. या भीतीमुळे जपानच्या सरकारी रोख्यांचे (Government Bonds) दर मागील अनेक वर्षांतील उच्चांकावर पोहोचले आहेत. २०२२ नंतरची ही सर्वात मोठी वाढ आहे.
२. ग्रीनलँड आणि अमेरिकेचा इशारा (Greenland Tension)
जपानमधील गोंधळ सुरू असतानाच, अमेरिकेने ग्रीनलँडवरून युरोपीय देशांना दिलेल्या इशाऱ्याने आगीत तेल ओतले.
अमेरिकेने युरोपवर नवीन कर (Tariffs) लादण्याची धमकी दिली आहे. यामुळे युरोपीय देशांना आपल्या संरक्षणासाठी जास्त खर्च करावा लागणार असल्याने आर्थिक स्थिती बिघडू शकते.
या तणावामुळे काही परदेशी संस्थांनी अमेरिकेतील आपली गुंतवणूक काढून घेण्यास सुरुवात केली आहे. डेन्मार्कच्या एका मोठ्या पेन्शन फंडाने १०० दशलक्ष डॉलरची अमेरिकन गुंतवणूक विकण्याची घोषणा केली आहे.
३. गुंतवणुकीवर काय परिणाम होणार ?
जेव्हा जपानसारख्या मोठ्या देशात व्याजाचे दर वाढतात, तेव्हा त्याचा परिणाम पूर्ण जगावर होतो.
जपानचे गुंतवणूकदार जगभरात मोठी गुंतवणूक करतात. पण आता त्यांच्या स्वतःच्या देशात म्हणजेच जपानमध्ये चांगला परतावा मिळत असल्याने, ते अमेरिका आणि युरोपमधून आपला पैसा काढून परत जपानमध्ये नेण्याची शक्यता आहे. सध्याची परिस्थिती पाहता, अमेरिकन बॉण्ड्सपेक्षा युरोपियन किंवा स्वतःच्या देशातील गुंतवणूक जास्त सुरक्षित असल्याचे गुंतवणूकदारांना वाटू लागले आहे.
जपानमधील वाढता सरकारी खर्च आणि अमेरिकेची आक्रमक भूमिका यामुळे जागतिक बाजारातील 'स्थिरता' संपुष्टात आली आहे. गुंतवणूकदार आता जोखीम घेण्याऐवजी आपले पैसे सुरक्षित ठिकाणी म्हणजेच सोने आणि चांदीकडे वळवत आहेत.
