शेअर बाजारात मोठी घसरण, एकाच दिवसात ७ लाख कोटींचे नुकसान
गुरुवारी भारतीय शेअर बाजारात मोठी घसरण पाहायला मिळाली. सेन्सेक्स २०१९ अंकांनी (२.६२%) कोसळून ७४,६८५.५२ वर आला, तर निफ्टी ६२३ अंकांनी (२.६२%) घसरून २३,१५५.२० वर पोहोचला. जागतिक बाजारातील नकारात्मक संकेत आणि पश्चिम आशियातील वाढत्या तणावामुळे गुंतवणूकदारांमध्ये भीतीचे वातावरण आहे.
बाजारापुढील ५ मोठी संकटे
१. कच्च्या तेलाच्या किमतीत मोठी वाढ :
पश्चिम आशियातील वाढत्या तणावामुळे कच्च्या तेलाच्या किमतीत ४% पर्यंत वाढ झाली आहे. अमेरिकन WTI क्रूड ३.१% ने वधारून $९९.३१ प्रति बॅरलवर पोहोचले आहे, तर ब्रेंट क्रूड ४.१% च्या वाढीसह $१११.५९ वर व्यापार करत आहे.
२. पश्चिम आशियातील युद्धजन्य परिस्थिती
अमेरिका, इस्रायल आणि इराण यांच्यातील संघर्ष तिसऱ्या आठवड्यात प्रवेश करत असल्याने अनिश्चितता वाढली आहे. अलीकडील हल्ल्यांमुळे तेल आणि गॅस पुरवठ्यावर परिणाम होण्याची शक्यता आहे. जर परिस्थिती अधिक बिघडली, तर कच्च्या तेलाचे दर आणखी भडकण्याची शक्यता असून त्याचा थेट परिणाम बाजारातील मानसिकतेवर होत आहे.
३. आशियाई बाजारात पडझड
गुरुवारी सर्वच प्रमुख आशियाई बाजार लाल निशाण्यावर व्यवहार करत आहेत. जपानचा निक्केई (Nikkei) २.५% आणि टोपिक्स (Topix) १.८% ने घसरला आहे. दक्षिण कोरियाचा कोस्पी (Kospi) २.६% आणि ऑस्ट्रेलियाचा S&P/ASX २०० देखील १.५% ने खाली आला आहे.
४. अमेरिकन फेडरल रिझर्व्हचा (FOMC) निर्णय:
फेडरल रिझर्व्हने व्याजदर ३.५% ते ३.७५% वर स्थिर ठेवले आहेत. मात्र, फेडचे अध्यक्ष जेरोम पॉवेल यांनी महागाई अपेक्षेप्रमाणे कमी होत नसल्याबद्दल चिंता व्यक्त केली आहे. नजीकच्या भविष्यात व्याजदरात कपात होण्याची शक्यता नसल्याचे संकेत दिल्याने बाजारावर दबाव वाढला आहे.
५. अमेरिकन शेअर बाजारातील घसरण
बुधवारी अमेरिकन बाजार मोठ्या घसरणीसह बंद झाले. डाऊ जोन्स (Dow Jones) ७६८.११ अंकांनी (१.६३%) कोसळून ४६,२२५.१ वर बंद झाला. याचा थेट परिणाम जागतिक आणि पर्यायाने भारतीय शेअर बाजारावर झाला आहे.
६. HDFC बँकेत मोठी विक्री
बँकिंग क्षेत्रातील दिग्गज HDFC बँकेचे शेअर्स ८% पेक्षा जास्त कोसळले. बँकेचे अर्धवेळ अध्यक्ष (Part-time Chairman) आणि स्वतंत्र संचालक अतनु चक्रवर्ती (Atanu Chakraborty) यांनी आपल्या पदाचा राजीनामा दिल्याची घोषणा केल्यानंतर ही मोठी पडझड पाहायला मिळाली.
दरम्यान, HDFC बँकेने HDFC लिमिटेडचे माजी मुख्य कार्यकारी अधिकारी (CEO) केकी मिस्त्री (Keki Mistry) यांची भारतीय रिझर्व्ह बँकेच्या (RBI) मंजुरीनंतर 'हंगामी अर्धवेळ अध्यक्ष' म्हणून नियुक्ती केली आहे.
