भारतीय टपाल विभागातर्फे वैभव मांगले आणि राहुल भंडारे यांचा अनोखा सन्मान

मुंबई : नाट्यक्षेत्रात विश्वविक्रम करणाऱ्या 'अलबत्या-गलबत्या' या बालनाट्याची थेट भारतीय टपाल विभागाने दखल घेतली आहे. जागतिक टपालदिनाचे औचित्य साधून या नाटकात चेटकिणीची भूमिका करणारे अभिनेते वैभव मांगले आणि प्रयोगशील निर्माते राहुल भंडारे यांचे छायाचित्र असलेले टपाल तिकीट जाहीर करून त्यांचा सन्मान करण्यात आला आहे.

येत्या ११ ऑक्टोबर ते १६ ऑक्टोबरदरम्यान भारतीय डाक विभागाच्या मुंबई पूर्व विभागातर्फे 'नॅशनल पोस्टल वीक' साजरा करण्यात येणार आहे. या निमित्ताने अभिनेते वैभव मांगले आणि नाट्यनिर्माता राहुल भंडारे यांच्या पोस्टल तिकिटाचे अनावरण होणार आहे.

'अलबत्या गलबत्या' या बालनाट्यात चिंची चेटकिणीची भूमिका साकारत वैभव मांगले यांनी तीन वर्षांच्या लहान मुलापासून ते वृद्धांपर्यंत सर्वांना चेटकिणीच्या प्रेमात पाडले. त्यांच्या अनेक भूमिका प्रेक्षकांच्या मनावर अधिराज्य गाजवत आहेत. तर मागील १५ ते १६ वर्षे व्यावसायिक नाट्य क्षेत्रात एक यशस्वी निर्माता म्हणून राहुल भंडारे कार्यरत आहेत. कोणताही कौटुंबिक वारसा नसताना, आर्थिक पाठबळ नसताना नाटक क्षेत्रामध्ये त्यांनी उत्तम कामगिरी केली. या दोन्ही कलावंतांनी रंगभूमीसाठी दिलेल्या योगदानाबद्दल भारतीय टपाल विभागातर्फे त्यांचा तिकिटाच्या रूपाने सन्मान करण्यात येणार आहे.