#Tokyo2020 : भारतीय महिलांची घोडदौड...लव्हलीना बार्गोहेनने जिंकलं कांस्य पदक

टोकीयो ऑलिम्पिक २०२० मध्ये अप्रतिम कामगिरी करत भारताची महिला बॉक्सर लव्हलीना बार्गोहेन हिनं कांस्य पदक जिंकले आहे. तिच्या विजयाने भारताच्या खात्यात आणखी पदक जमा झाले आहे. आतापर्यंत भारताला तीन पदकं मिळाली आहेत. लव्हलीना बार्गोहेन हिला उपांत्य फेरीच्या सामन्यात विश्वविजेती असलेली तुर्कस्थानची बुसेनाझ सुरमेनेली हिच्याकडून पराभव पत्करावा लागला.

टोकीयो ऑलिम्पिक २०२० च्या सुरुवातीपासूनच लव्हलीना हीने अप्रतिम कामगिरी केली होती. लव्हलीना बार्गोहेन हिनं उपांत्य फेरीमध्ये धडक मारताच एक पदक निश्चित केले होते. पण बुधवारी उपांत्य फेरीच्या सामन्यात विश्व विजेत्या बुसेनाझ सुरमेनेलीविरूध्द जिंकून आपल्या पदकाचा रंग बदल्याण्याची संधी लव्हलीनाकडे होती. पण अटीतटीच्या सामन्यात सुरमेनेलीने लवलीनाला 5-0 ने पराभूत करत अंतिम फेरी गाठली. लवलीना पराभूत झाली असली तरी तिने कांस्य पदक मिळवले आहे.

भारताला ऑलिम्पिक स्पर्धेत पदक मिळवून देणारी लव्हलीना तिसरी बॉक्सर आणि दुसरी महिला बॉक्सर ठरली आहे. याआधी २००८ मध्ये बीजिंग ऑलिम्पिकमध्ये विजेंदर सिंहने कांस्य पदक जिंकले होते. तर २०१२च्या लंडन ऑलिम्पिक्समध्ये ६ वेळा विश्वविजेती ठरलेल्या मेरी कोमने कांस्य पदक आपल्या नावे केले होते. विशेष म्हणजे लव्हलीनाने ऑलिम्पिक स्पर्धेत पदार्पणातच पहिलं पदक जिंकलं आहे.

लव्हलीनाची ऑलिम्पिक २०२० मधील कामगिरी

टोकीयो ऑलिम्पिक २०२०मध्ये लव्हलीनाने पहिल्याच सामन्यात जर्मनीच्या आपेत्झ नदीने हिचा ३-२ ने पराभव केला होता. उपांत्यपूर्व फेरीच्या सामन्यात तिने चेन निआन चिन हिचा ४-१ असा एकतर्फी पराभव केला होता. तसेच दिमाखात उपांत्य फेरी गाठत कांस्य पदक निश्चित केले होते. मात्र उपांत्य फेरीत तिला तुर्कस्थानच्या बुसेनाझ सुरमेनेलीविरूध्द पराभवाला सामोरं जावं लागलं.