माथेफिरूची भर रस्त्यात तलवारबाजी; पोलिस कर्मचारी जखमी

 कल्याण : एका माथेफिरूने हातात तलवार घेऊन भर रस्त्यात धिंगाणा घातल्याची घटना कल्याण पूर्व मलंग रोड पिसवली परिसरात घडली. या माथेफिरुने ड्युटीवर जात असलेल्या एका पोलीस कर्मचाऱ्यावर पाठीमागुन हल्ला केला. या हल्ल्यात पोलीस कर्मचारी जखमी झाला असून, त्याच्यावर रुग्णालयात उपचार सुरू आहेत. भैय्यासाहेब अहिरे असं या जखमी कर्मचाऱ्याचं नाव आहे. या घटनेनं परिसरात एकच खळबळ उडाली आहे. दरम्यान मानपाडा पोलिसांनी या प्रकरणी बबलू नायक याला अटक केलीये.

कल्याण पूर्वेकडील मलंग रोड पिसवली येथे राहणारा बबलू नायक हा 30 जुलै रोजी सकाळी 10 वाजण्याच्या सुमारास हातात तलवार घेऊन रस्त्यावर ये-जा करणाऱ्या लोकांच्या मागे धावत होता. याच दरम्यान या माथेफिरुने या रस्त्यावरून ड्युटीवर जाणाऱ्या भैय्यासाहेब अहिरे या पोलीस कर्मचाऱ्यांवर पाठीमागून तलवारीने हल्ला केला. त्याने आणखी चार वार केले. मात्र, अहिरे यांनी ते चुकवले. या हल्ल्यात अहिरे यांच्या डोक्याला गंभीर दुखापत झाली आहे. त्यांना खाजगी रुग्णालयात दाखल करण्यात आले.

दरम्यान घटनेची माहिती मिळताच मानपाडा पोलिस घटनास्थळी दाखल झाले. स्थानिक नागरिकांच्या मदतीने पोलिसांनी बबलू नायक याला अटक करण्यात आली. दरम्यान या आधी बबलू ने त्याच्या आईला देखील मारहाण केली होती. बबलूने तलवार कुठून आणली याचा तपास पोलीस करत आहेत.