'रामायण' मालिकेत रावणाची भूमिका साकारणारे जेष्ठ अभिनेते अरविंद त्रिवेदी यांचे निधन

'रामायण' या टीव्ही जगतातील लोकप्रिय मालिकेत रावणाची व्यक्तिरेखा साकारणारे जेष्ठ अभिनेते अरविंद त्रिवेदी यांचे वयाच्या 82 व्या वर्षी निधन झाले. आज सकाळी मुंबईतील डहाणूकरवाडी स्मशानभूमी येथे अरविंद त्रिवेदी यांच्यावर अंत्यसंस्कार होणार आहे. मागील काही दिवसांपासून ते आजारी होते, हृदयविकाराचा झटका आल्याने त्यांचे निधन झाले. अरविंद त्रिवेदी यांचे पुतणे कौस्तुभ त्रिवेदी यांनी याबाबत माहिती दिली. 'रामायण'मध्ये रावनाची जबरदस्त भूमिका साकारणाऱ्या अरविंद त्रिवेदी यांच्या इतरही काही भूमिका अत्यंत लोकप्रिय ठरल्या होत्या. त्यांनी टीव्ही मालिका 'विक्रम आणि वेताळ'मध्येही काम केले होते. ही मालिकाही बरेच दिवस चालली होती.

त्रिवेदी यांचा जन्म मध्य प्रदेशातील उज्जैन येथे झाला होता. त्यांनी गुजराती रंगमंचावरून आपल्या कारकिर्दीची सुरुवात केली होती. त्यांचे भाऊ उपेंद्र त्रिवेदी हेही गुजराती सिनेमांतील एक चर्चित नाव आहे. गुजराती भाषेतील धार्मिक आणि सामाजिक सिनेमांतून अरविंद त्रिवेदी यांना एक विशेष ओळख मिळाली. त्यांना अनेक पुरस्कारही मिळाले आहेत.त्यांच्या निधनाने अनेकांनी शोक व्यक्त केला.