'माझे पप्पा' हा हृदयस्पर्शी निबंध लिहणाऱ्या 'त्या' मुलाची धनंजय मुंडेंनी घेतली दखल
बीड जिल्ह्यातील आष्टी तालुक्यातील वाळकेवाडी या छोट्याशा गावातील चौथीच्या वर्गात शिकणाऱ्या मंगेश वाळके या विद्यार्थ्याचा 'माझे पप्पा' हा अत्यंत भावनिक निबंध व्हायरल झाल्यानंतर आज सामाजिक न्याय व विशेष सहाय्य मंत्री धनंजय मुंडे यांनी त्याची दखल घेतली आहे. मंगेशच्या परिवाराला सामाजिक न्याय विभागांतर्गत दिव्यांग कल्याण निधीतून अर्थसहाय्य व इतर मदत मिळणार आहे. छोट्याशा मंगेशच्या डोक्यावर वडिलांचे छत्र नसून आई दिव्यांग आहे.
'माझे पप्पा काही दिवसांपूर्वी टीबी च्या आजाराने वारले, मी पाण्यात बुडत असलेली गाय कशीबशी बाहेर काढली, आम्हाला कोणीही मदत करत नाही, मला व आईला चोरांची भीती वाटते, पप्पा मला तुमची खूप आठवण येते अशा अत्यंत भावनिक शब्दात मंगेशने आपल्या व्यथा शाळेतील निबंधाच्या वहीत मांडल्या होत्या.
मंगेशच्या वडिलांचा काही दिवसांपूर्वी मृत्यू झालेला आहे त्याच्या आई शारदा वाळके ह्या दिव्यांग आहेत. परिवारात कोणीही कमावते नसल्याने माय-लेकरांची परिस्थिती अत्यंत हलाखीची आहे. मंगेशच्या दाटलेल्या भावना पाहून त्याच्या शिक्षिकेने तो निबंध इतराना पाठवून मदतीचे आवाहन केले होते. त्यानंतर हा निबंध सोशल मीडियावर व्हायरल झाल्यावर याविषयी ‘मॅक्समहाराष्ट्र’ने पप्पा परत या! शालेय निबंधातून चौथीच्या मुलाची दिवंगत वडिलांना हाक.. या आशयाचं वृत्त प्रकाशित केलं होतं. यावर दखल घेत धनंजय मुंडे यांनी मंगेशच्या शिक्षणाचीही पुर्ण जबाबदारी आपल्या नाथ प्रतिष्ठान या ट्रस्टच्या माध्यामातून घेणार असल्याचं सांगितलं आहे.
दरम्यान धनंजय मुंडे यांनी तात्काळ समाज कल्याण विभागामार्फत 'दिव्यांग बीज भांडवल योजना अंतर्गत 1.5 लक्ष रुपये स्वयंरोजगारासाठी अर्थ सहाय, जिल्हा परिषदेच्या दिव्यांग कल्याण निधीतून शेष ५%, बस पास, यु. डी. आय.डी. कार्ड, तसेच दिव्यांग महामंडळामार्फत रोजगारासाठी अर्थसहाय्य आदि योजना लागू करून वाळके परिवारास भरीव आर्थिक मदत करण्याचे निर्देश संबंधित विभागाच्या अधिकाऱ्यांना दिले आहेत.
https://www.facebook.com/MaxMaharashtra/videos/174979060532601/?t=20
