प्रजासत्ताक दिनी घुमणार नेत्रहिन तरुणांचा कलात्मक आवाज

कलाकार हा भावनाप्रधान असतो. आपल्या आजुबाजूला घडणाऱ्या गोष्टींचा त्याच्या मनावर खोलवर परिणाम होतो. ही भावना तो आपल्या कलेच्या माध्यमातून व्यक्त करताना पाहायला मिळतो. अशा प्रकारच्या देशहिताच्या भावनेतून एक गाणं या नेत्रहिन तरुणांनी देशाला अर्पण केलं आहे. २६ जानेवारी प्रजासत्ताक दिनानिमित्त श्रीरंग फाऊंडेशन आणि ‘फ्रेम मी’ मीडियाच्या संयुक्त विद्यमाने या गाण्याचे अनावरण होणार आहे.

प्रजासत्ताक दिनाच्या निमित्ताने मुंबईतल्या नेत्रहिन विद्यार्थ्यांनी एकत्र येत गाण्याच्या माध्यमातून शांततेचा संदेश दिला आहे. दगड, लाठी ही आंदोलनाची प्रतिकं मानली जातात. पण याच गोष्टींचा संगीतात उपयोग करुन त्यांना सूर आणि तालाची जोड देत कलात्मक पद्धतीने हे कलाकार व्यक्त झाले आहेत. विद्यार्थ्यांपासून ते सैनिकांपर्यंत आपण प्रत्येकजण आपापल्या परिने देशाच्या हितासाठी योगदान देत असतो. आपली ही सार्वभौमत्वता, अखंडता कायम टिकून राहावी, याचे स्मरण आपल्याला राष्ट्रगीतातून होत असते. महत्वाचे म्हणजे नेत्रहिन विद्यार्थ्यांनी ही संपूर्ण कलाकृती साकारणे हे सर्वासाठी एक नवी दृष्टी देणारे होते. अनैसर्गिक ध्वनीच्या माऱ्यामुळे होणाऱ्या प्रदुषणाच्या मोठ्या समस्येतून आपण सध्या जात आहोत. अशा वेळी नैसर्गिक ध्वनी निर्मितीचे महत्व पुन्हा एकदा अधोरेखीत होतंय.

दगड, पाणी, लाकूड यातून निर्माण होणारा ध्वनी ऐकण्यासाठीही अल्हाददायक असतो. अशा ३६ नैसर्गिक वस्तूंचा वापर करुन राष्ट्रगीत ध्वनीबद्ध करावं अशी संकल्पना कलादिग्दर्शक आणि ‘श्रीरंग’चे संस्थापक सुमीत पाटील यांना सुचली. ध्वनीचं ज्यांच्या आयुष्याचा अविभाज्य भाग आहे अशा नेत्रहिन तरुणांना घेऊन त्यांनी ही संकल्पना प्रत्यक्षात उतरवली आहे.

या गाण्यातील विशेष बाब म्हणजे बासरी, तबला, पेटी या पारंपारिक वाद्यांसह दगड, पाटा-वरवंटा, सूप, पाणी, पिपाणी, घुंगरु अशा ३६ नैसर्गिक वस्तूंचा उपयोग गाण्याचे संगीत तयार करण्यासाठी केला गेला आहे. अंध तरुण कलाकारांनी हे गाणं तयार केले असून त्यांच्यावरच हे चित्रित करण्यात आले आहे. प्रशांत बानिया, जयेश बानिया, मनश्री सोमण आणि योगिता तांबे अशी या नेत्रहिन कलाकारांची नावे आहेत. हे गाणं पाहील्यावर नेत्रहिन कलाकार आपल्याला जगण्याची नवी दृष्टी देतात हे कळते.

कलादिग्दर्शक सुमीत पाटील यांच्या संकल्पनेतून साकारलेल्या या गाण्याचे संगीत प्रशांत आणि निशांत यांनी केले असून निला माधव माहोपात्रा, संदेश कदम यांनी संगीत सहाय्य केले आहे. याचे डीओपी आदित्य नाईक, आरती कडवकर तर सौरभ नाईक यांनी व्हिडीओ एडीटींग केलं आहे.